വിഴിഞ്ഞത്ത് മുൻ ഫയർഫോഴ്സ് ഉദ്യോഗസ്ഥന്റെ വീട്ടിൽ മോഷണം; 90 പവൻ സ്വർണവും ഒരു ലക്ഷം രൂപയും കവർന്നു
തിരുവനന്തപുരം ∙ വിഴിഞ്ഞം വെണ്ണിയൂരിൽ മുൻ ഫയർഫോഴ്സ് ഉദ്യോഗസ്ഥനായ ഗിൽബർട്ടിന്റെ വീട്ടിൽ നിന്നാണ് 90 പവൻ സ്വർണവും 1 ലക്ഷം രൂപയും മോഷണം പോയത്.
വീട്ടിൽ ആരും ഇല്ലാത്ത സമയത്താണ് മോഷണം നടന്നത്. വീടിന്റെ രണ്ടാമത്തെ നിലയിലാണ് സ്വർണം സൂക്ഷിച്ചിരുന്നത്. ഒരു ലക്ഷം രൂപ താഴത്തെ നിലയിലെ മുറിയിൽ നിന്നുമാണ് മോഷിക്കപ്പെട്ടത്.
സഹോദരിയുടെ മകന്റെ മരണവുമായി ബന്ധപ്പെട്ട് വീട്ടുകാർ സമീപത്തെ സഹോദരിയുടെ വീട്ടിലായിരുന്നു രാത്രി ഉറങ്ങാൻ പോയിരുന്നത്. സംഭവം കൃത്യമായി അറിയാവുന്ന ആരുടേയോ പ്രവൃത്തിയാണെന്നാണ് വീട്ടുകാർ സംശയിക്കുന്നത്.
രാവിലെ വീട്ടുകാർ തിരിച്ചെത്തിയപ്പോൾ മുന്നിലെ വാതിൽ തുറന്ന നിലയിലായിരുന്നു. വിവരം ലഭിച്ച വിഴിഞ്ഞം പൊലീസ് സ്ഥലത്തെത്തി നടപടികൾ സ്വീകരിക്കുകയും അന്വേഷണം ആരംഭിക്കുകയും ചെയ്തു. എം. വിൻസന്റ് എംഎൽഎ സംഭവസ്ഥലത്തെത്തി വീട്ടുകാരുമായി സംസാരിച്ചു.
