“കോൺഗ്രസിന് ഹിന്ദു വോട്ടു വേണ്ട; ശബരിമല ആചാര സംരക്ഷണത്തിൽ ബിജെപി നിഷ്ക്രിയം”: ജി. സുകുമാരൻ നായർ
തിരുവനന്തപുരം ∙ കോൺഗ്രസിന് ഹിന്ദു വോട്ടുകളൊന്നും വേണ്ടെന്നാണ് തോന്നുന്നതെന്ന് എൻഎസ്എസ് ജനറൽ സെക്രട്ടറി ജി. സുകുമാരൻ നായർ ആരോപിച്ചു. ശബരിമല ആചാര സംരക്ഷണവുമായി ബന്ധപ്പെട്ട വിഷയങ്ങളിൽ കോൺഗ്രസ് ആരംഭത്തിൽ തന്നെ വിട്ടു നിന്നുവെന്നും, വോട്ട് ബാങ്ക് രാഷ്ട്രീയമാണ് അവരുടെ നിലപാടുകൾക്കു പിന്നിൽ എന്നും അദ്ദേഹം വ്യക്തമാക്കി. ശബരിമല പാരമ്പര്യങ്ങൾ സംരക്ഷിക്കാൻ എൽഡിഎഫ് സർക്കാർ സ്വീകരിച്ച നടപടികളെ അദ്ദേഹം പ്രശംസിക്കുകയും ചെയ്തു.
കോൺഗ്രസിന് ഹിന്ദു വോട്ടുകളല്ല മറിച്ച് ന്യൂനപക്ഷ വോട്ടുകൾ മാത്രമാണ് വേണ്ടത്. തിരഞ്ഞെടുപ്പ് അടുത്തിരിക്കെ വോട്ട് ബാങ്ക് രാഷ്ട്രീയത്തിനായാണ് ബിജെപിയും കോൺഗ്രസും ആഗോള അയ്യപ്പ സംഗമം ബഹിഷ്കരിച്ചത്. സ്ത്രീ പ്രവേശനത്തിൽ സുപ്രീം കോടതി വിധി പുറപ്പെടുവിച്ചപ്പോൾ, എൻഎസ്എസ് മാത്രമാണ് നാമജപ ഘോഷയാത്രകളുടെ രൂപത്തിൽ പ്രതിഷേധം നടത്തിയത്. അന്ന് കോൺഗ്രസും ബിജെപിയും അതിൽ പങ്കുചേർന്നില്ല. വിശ്വാസികൾ കൂട്ടത്തോടെ പങ്കെടുക്കുന്നുണ്ടെന്ന് മനസ്സിലാക്കിയ ശേഷമാണ് അവർ ചേർന്നത്. ശബരിമല ആചാരങ്ങൾ സംരക്ഷിക്കുന്നതിൽ ബിജെപി നയിക്കുന്ന കേന്ദ്രസർക്കാരോ കോൺഗ്രസോ യാതൊന്നും ചെയ്തിട്ടില്ല. സുകുമാരൻ നായർ പറഞ്ഞു.
സുപ്രീം കോടതി വിധി തങ്ങൾക്ക് എതിരായിരുന്നെങ്കിലും, എൽഡിഎഫ് സർക്കാർ സ്ത്രീ പ്രവേശനം നടപ്പിലാക്കിയില്ല. അവർക്ക് വേണമെങ്കിൽ അവർക്ക് അത് ചെയ്യാമായിരുന്നുവെന്നും എന്നാൽ പാരമ്പര്യങ്ങൾ അതേപടി നിലനിർത്തുകയാണ് എൽഡിഎഫ് ചെയ്തതെന്നും അദ്ദേഹം പറഞ്ഞു.
സുപ്രീംകോടതി വിധിയുടെ പശ്ചാത്തലത്തിൽ ആചാരങ്ങൾ ലംഘിക്കപ്പെടാതിരിക്കാനുള്ള നടപടി സംസ്ഥാന സർക്കാർ സ്വീകരിച്ചതായും, ശബരിമല ആചാരങ്ങളിൽ ഇടപെടില്ലെന്നുറപ്പു ദേവസ്വം മന്ത്രി മുഖേന തന്നെ നൽകിയിട്ടുണ്ടെന്നും എൻഎസ്എസ് വ്യക്തമാക്കി.
